Ngā whenu – ngā tūranga mātāmua o te kaitātaki
Ka heke mai ngā whenu o te korowai i te aho tapu. Ko ia whenu e waitohu ana i tētahi tūranga matua o te kaitātaki. Koia ēnei:
| Te tūranga o te kaitātaki: | Ngā mahi: |
|---|---|
| Ka maru koe i tōku pūreke, he kahu pītongatonga | he tiaki, he poipoi i tētahi taiao atawhai, e uaratia ai ngā tāngata me ngā whakaaro; e hāpaitia ai te hauora, te haumaru me te noho ora; e torokaha ai ngā taura tangata |
| E kore te matau e rawe ki te moana takai ai, engari anō a uta | he whakahaere i ngā tāngata, i ngā taiao, i ngā whakaakoranga kia nui te whaihua, kia iti ngā whakapaunga, e pai ake ai ngā hapori whakaako me ngā hapori ako |
| Māku e whatu, mā koutou e tāniko | he kawe i ngā mahi tātaki i runga i te nanao atu i ngā whakaaro hou me te anga o te titiro ki tua, kia whiwhi ai ngā ākonga i ngā mātauranga, i ngā pūkenga me ngā uara e angitu ai rātou i te rautau 21, i tā rātou tū hei Māori, hei tāngata anō o te ao |
| Ko te manu e kai ana i te miro, nōna te ngahere. Ko te manu e kai ana i te mātauranga, nōna te ao | he ako tauutuutu, he whakatauira papai i te nanaotanga atu o ngā whakaaro hou, e waihangatia ai, e horahia ai ngā horopaki ako tūturu me ngā akoranga tuawhiti tonu |
| Ehara taku toa i te toa takitahi, engari he toa takitini | ko te ārahi mā te kawe tonu i te mahi, he āta mahi tahi ki ngā hoamahi e nui ake ai tō rātou āhei ki te whakatutuki haere i ngā whāinga a te kura |
| Kotahi te kōhao o te ngira e kuhuna ai te miro mā, te miro pango, te miro whero | he tuitui, he poipoi taura tangata, he taka i waenga i ngā rōpū, e tutuki haere ai ngā whāinga a te kura |
| Kaua e rangiruatia te hāpai o te hoe; e kore tō tātou waka e ū ki uta | he whakatairanga i te tārainga me te whakatinanatanga o ngā rautaki, ngā mahere me ngā kaupapa-here, e eke ai ia ākonga ki te tino taumata e taea ana e ia, e puta ai tōna ihu i ngā mahi rapu mātauranga, i runga anō i tana tū hei Māori |
