Ngā aho – ngā arotahinga mātāmua o ngā mahi tātaki
Ka rere haere ngā aho o te korowai i waenga i ōna whenu, e piri tahi ai ngā wāhanga katoa hei kākahu. Ko ia aho tētahi arotahinga matua mō ngā mahi tātaki, inā koa:
| Te arotahinga matua: | Te arotahinga a te kaitātaki: | Ngā hua ka puta ki ngā ākonga: |
|---|---|---|
| TE MANA MOKOPUNA Ko te mokopuna te pūtake o te mātauranga | ngā mea tērā tonu ka taea e te ākonga, me te puta o tōna ihu i ana mahi rapu mātauranga | Ka tuawhiti tonu ngā mātauranga ka horahia mā te ākonga, ko te arotahinga ia, ko te whai kia tutuki katoa i a ia ngā mea ka taea e ia, kia puta anō ia, i runga i tana tū hei Māori, hei tangata anō o te ao |
| TE MANA WAIRUA He puna wairua He puna tangata | te noho ora o tēnā, o tēnā ākonga – taha tinana, taha kare ā-roto, taha pāpori, taha mātauranga | I roto i te āhua o tana kawe i a ia, i ana waiaro me ana whanonga, ka kitea te kiritau me te ngākau pai o te ākonga ki a ia anō |
| TE MANA TANGATA He toi whakairo, he mana tangata | te whiri i ngā taura tangata i runga i te whakapono, i te ngākau pono, me te whakaaro rangatira ki ētahi atu | Ka pakari haere te noho ora o te ākonga – taha tinana, taha wairua, taha hinengaro; ka mārama haere ki tōna anō ahurei ki tēnei ao; ka mōhio, ka whakaaro pai ki ōna ake āhuatanga whaiaro, me ō ētahi atu |
| TE MANA REO Ko te reo te waka wairua o ō tātou tīpuna | te whakarite, te whakapakari ake, te whakapūmau i te horahanga o ngā whakaakoranga tuawhiti tonu ki te reo Māori, i roto i ngā kawenga o ia rā | Ka mōhio tonu te ākonga ki te āta whakaaro, ki te kōrero, ki te pānui, ki te tuhi ki te reo Māori me te reo Pākehā |
| TE MANA TIKANGA He tangata i ākona ki te whare, tūnga ki te marae tau ana | te whai kia kawea ake ngā tikanga Māori e tika ana i roto i ngā whakahaere me ngā mahi katoa o te kura | Ka mōhio pai te ākonga ki ōna whakapapa, ka whai whakaaro nui ki ngā tūmanako me ngā wawata o tana whānau, o tana hapū, o tana iwi |
| TE MANA MĀTAURANGA Ko te waka mātauranga, he waka eke noa | te whakaū i te whakaaro he hua anō kei roto i te tū hei Māori, me te whakaaro Māori | Ka mārama te ākonga ki ngā titiro o nāianei me ngā titiro o neherā ki te ao Māori me te ao tūroa |
| TE MANA Ā-KURA Mā tātou katoa hei whakatō i te whakaaro ka puta ki te ao | te tautohu, te whakatakoto kaupapa whakaako, kaupapa ako e hāngai pū ana ki ngā whāinga me ngā wawata o ngā whānau o te kura | Ka whakahihikongia te hinengaro o te ākonga i roto i tētahi taiao e māmā ai te ako |
